“HAKUNA MWANAFUNZI ATAKAYEKOSA KUJIUNGA KIDATO CHA KWANZA KWA CHANGAMOTO YA MADARASA JIJINI MBEYA” RC HOMERA

Imewekwa Tarehe: December 29th, 2022

Mkoa wa Mbeya umetangaza hakutokuwa na changamoto ya madarasa itakayopelekea wanafunzi walio faulu kuingia kidato cha kwanza kushindwa kuanza masomo pindi muhula mpya utakapoanza tarehe 8 Januari 2023 kufuatia ongezeko la madarasa zaidi ya elfu moja.

Mkuu wa Mkoa wa Mbeya Juma Homera ameyazungumza hayo baada ya kumaliza ziara ya ukaguzi wa miradi ya maendeleo aliyoifanya kwenye Halmashauri ya Jiji la Mbeya kwa kukagua miradi ya Afya na Elimu na kuweka bayana kuwa watoto 45,559 waliofaulu kuingia kidacho cha kwanza wataingia madarasani kufuatia ongezeko la madarasa zaidi ya elfu moja Mkoa mzima.

Aidha Mkuu huyo wa Mkoa ametoa pongezi kwa Hlamashauri ya Jiji la Mbeya chini ya Kaimu Mkurugenzi Wakili Triphonia Kisiga kwa kushika nafasi ya nane kitaifa kwa kufaulisha watoto 11,321 ikiwa ni ongezeko la ufaulu la asilimia mbili(2%) huku Mkoa mzima ukiwa umefaulisha watoto 45,559.

Pia Mkuu wa Mkoa Juma Homera ametoa maelekezo kwa Watendaji Kata kuhakikisha watoto wote waliofaulu wanaripoti kwenye shule walizopangiwa na kuwachukulia hatua wazazi wote watakaokwamisha wanafunzi kuingia shule kwa kuwapeleka kwenye shughuli za shamba na mambo mengine kwa vile hakuna kisingizio maana Serikali inatoa elimu bure kuanzia ngazi ya awali,shule ya msingi mpaka kidato cha sita.

Naye Kaimu Mkurugenzi wa Halmashauri ya Jiji la Mbeya Wakili Triphonia Kisiga amemhakikishia Mkuu wa Mkoa na watanzania kiujumla kuwa hakutokuwa na mwanafunzi atakayekosa nafasi ya kuingia kidato cha kwanza kutokana na changamoto ya madarasa kwa vile Serikali ya awamu ya sita inayoongozwa na Rais Mh.Dkt.Samia Suluhu Hassan imelipatia Jjiji hilo shilingi milioni 260 ambazo zimejenga vyumba vya madarasa 13 yakiwa na viti na meza.

Wakili Triphonia Kisiga ameongeza kuwa kwa kiasi hicho cha shilingi milioni 260 wamekamilisha ujenzi wa vyumba hivyo kumi na tatu vikiwa na umeme,viti na meza kwa asilimia mia (100%) hivyo watoto 11,321 waliofaulu wataingia darasani ifikapo tarehe 8 Januari 2023 bila changamoto.