IDADI NDOGO YA WATOTO WASIOKUWA NA VYETI VYA KUZALIWA MKOANI MBEYA YAMUIBUA RC HOMERA NA KAMPENI YA UANDIKISHAJI WATOTO CHINI YA MIAKA MITANO

Imewekwa Tarehe: April 24th, 2023

Mkoa wa Mbeya umezindua zoezi la kuhakikisha watoto wenye umri chini ya miaka mitano wanaandikishwa na kupata vyeti vya kuzaliwa kwenye Wilaya zote tano na Halmashauri zake saba.

Akiongea wakati wa kuzindua zoezi hili Mkuu wa Mkoa wa Mbeya Mh.Juma Homera amesema kwa mujibu wa sheria ya usajili wa vizazi na vifo Toleo namba 108 ya mwaka 2002 mtoto anatakiwa kuandishwa ndani ya siku tisini(90) tangu kuzaliwa kwake lengo likiwa kuhakikisha kila mtoto anakuwa na cheti kama takwa la kisheria (Sheria ya mtoto namba 21 ya mwaka 2009) linavyotaka.

Aidha Mkuu wa Mkoa ameeleza faida ya mwananchi kuwa na cheti cha kuzaliwa ni kurahisisha mchakato wa kupata huduma kutoka kwenye taasisi  mbalimbali ikiwemo Elimu,Afya,Ajira,NIDA na kuiwezesha serikali kupata takwimu sahihi na kutambulika kwa muhusika.

Mkoa wa Mbeya kwa kipindi cha Januari 2022 hadi Disemba 2022 jumla ya watoto wenye umri chini ya miaka mitano 35,391 wamesajiliwa na kupatiwa vyeti vya kuzaliwa kati ya watoto 82,212 waliozaliwa hai kwa kipindi hicho  sawa na asilimia 43 kwa mujibu wa kanzidata kutoka makao makuu ya RITA takwimu hii inaonesha idadi kubwa ya watoto kutokuwa na vyeti vya kuzaliwa.

Pia Mheshimiwa Juma Homera ameweka bayana baadhi ya changamoto zinazopelekea watoto kutokuwa na vyeti vya kuzaliwa ni baadhi ya wazazi au walezi kutoona umuhimu wa vyeti hivyo,kuchelewa kutoa jina kwa mtoto mara tu anapozaliwa ili aweze kupata cheti hapohapo,baadhi ya wakina mama kutokuwa na taarifa kamili za baba wa mtoto kama vile umri,majina,sehemu aliyozaliwa na makazi ambazo ni taarifa muhimu katika kuandikisha cheti cha kuzaliwa.

Zoezi hili linatarajia kufanyika kwa kipindi cha miezi mitatu kuanzia mwezi Aprili hadi mwezi Januari 2023 likihusisha watoto wenye umri chini ya miaka mitano,ambapo uandikishaji na utoaji wa vyeti utafanyika bila malipo na baada ya zoezi hili uandikishaji na utoaji vyeti vya kuzaliwa utafanyika bila malipo kwa watoto wanaozaliwa ndani ya siku tisini (miezi mitatu).