JIJI KUKARABATI NYUMBA KWA AJILI YA TIMU YA MBEYA CITY

Imewekwa Tarehe: April 18th, 2024

Kamati ya uchumi afya na elimu Halmashuri ya Jiji la Mbeya, imeridhia kufanyika kwa ukarabati wa nyumba  itakayotumika kwa ajili ya wachezaji wa timu ya Mbeya City iliyopo Block T pamoja na nyumba ya mwalimu wa timu iliyopo eneo la Soko Matola zitakazogharimu kiasi cha TZS 30,000,000.

Hatua hiyo inafuatia ziara iliyofanyika tarehe 18 Aprili, 2024 katika nyumba hizo ili kujiridhisha kama fedha zilizoombwa kwa ajili ya ukarabati ni halali.

 Mwenyekiti wa kamati hiyo Mhe. Juma Simbeyanje ambaye ndiye alikuwa mkuu wa msafara pamoja na wajumbe wa kamati hiyo wameridhia kufanyika kwa ukarabati huo ili kupunguza gharama za uendeshaji wa timu ya Mbeya City.

Aidha kamati hiyo imeridhishwa na mpango  wa kuwa na uwanja wa mazoezi wa timu ya Mbeya City katika eneo ambalo nyumba ya wachezaji hao itakayofanyiwa ukarabati.

Kwa upande wake Afisa Habari wa Klabu ya Mbeya City  Bw. John Kilua amesema lengo  ni kuhakikisha timu ya Mbeya City inapunguza gharama za uendeshaji kwani makadirio ya awali yaliyofanyika ili kukamilisha ukarabati wa nyumba hiyo itakayotumika kama kambi ya wachezaji inatarajiwa kugharimu TZS 14,000,000 wakati nyumba ya mwalimu wa timu itagharimu TZS 16,000,000

Kwa sasa wachezaji wa timu ya Mbeya City wanaishi katika nyumba ya kupanga iliyopo Isyesye jijini hapa, ambayo inalipiwa kodi ya TZS 600,000 kwa mwezi.

Aidha Kamati hiyo ilitembelea shule ya Msingi ya Uhuru, iliyopo eneo la Mwakibete na kukagua mradi wa ujenzi wa matundu ya vyoo vya wanafunzi ambao umekamilika na kubaini baadhi ya mapugufu ambayo yanatakiwa kufanyiwa maboresho kabla ya vyoo hivyo kuanza kutumika.