JIJI LA MBEYA LAVUKA MALENGO YA CHANJO YA POLIO LAFIKISHA ASILIMIA 120. SEPTEMBA 25 2023

Imewekwa Tarehe: September 25th, 2023

Halmashauri ya Jiji la Mbeya limevuka malengo ya utoaji Chanjo ya Matone ya Polio kwa watoto chini ya umri wa miaka nane kwa kufikia asilimia 120 tangu zoezi hilo lilipozinduliwa Septemba 21 mpaka Septemba 24 na Mkuu wa Mkoa wa Mbeya Mh.Juma Homera.

Akizungumza wakati wa kutoa taarifa hiyo Mratibu wa Chanjo Halmashauri ya Jiji la Mbeya Bi.Zuhura Mohamed amesema wamefanya vizuri katika zoezi hilo malengo yalikuwa kuchanja watoto waliochini ya umri wa miaka nane 138,916 baada ya kuanza zoezi la chanjo ya matone ya Polio wamefanikiwa kuchanja watoto 167,660 idadi ambayo sawa na asilimia 120.

Bi.Zuhura ameongeza kuwa katika kuhakikisha watoto wote waliochini ya umri wa miaka nane wanapatiwa chanjo ya matone ya Polio kwenye Jiji la Mbeya wameongeza siku mbili ili kufikia malengo ya Serikali ya awamu ya sita iliyochini ya Mh.Rais Dkt Samia Suluhu Hassan ya kuwalinda watoto kwa kuwapatia kinga yenye malengo ya kukilinda kizazi kijacho ili kiwe imara na chenye afya bora.

Vituo vya afya 53 vitatumika kutoa chanjo na timu maalum za uchanjaji zitatumia siku hizo mbili Setemba 25 na 26 kupita kwenye maeneo yaliyokuwa na Changamoto mbalimbali ili kufanikisha kuwapatia huduma ya chanjo watoto waliopitwa na kampeni hiyo.

Mratibu wa Chanjo Halmashauri ya Jiji la Mbeya  Bi.Zuhura Mohamed amesema mafanikio ya kufikia asilimia 120 kwenye zoezi la Chanjo ya matone ya Polio ni matunda ya ushirikiano na mipango madhubuti iliyopangwa kuanzia ngazi ya Mkoa chini ya Mkuu wa Mkoa Mh.Juma Homera,Mkuu wa Wilaya ya Mbeya Mh.Beno Malisa ,Mkurugenzi wa Jiji la Mbeya John Nchimbi ,Viongozi wa dini zote , Viongozi wa kimila,watumishi wa idara ya afya,watumishi wa idara nyingine sambamba na wananchi ambao walitoa ushirikiano mkubwa mpaka kufikia na kuvuka malengo.

Kufanyika kwa kampeni na zoezi la chanjo kwenya mikoa ya Mbeya ,Songwe ,Rukwa ,Katavi na Kagera kumetokana kuonekana kwa dalili za ugonjwa huo ambapo kwenye baadhi ya maeneo wamepatikana wagonjwa baada ya kuchukuliwa sampuli na kubainika watu hao wamepatwa na ugonjwa huo.