MADIWANI JIJI LA MBEYA WAPATA SEMINA ELEKEZI JUU YA UONGOZI

Imewekwa Tarehe: January 22nd, 2026

Madiwani wa Halmashauri ya Jiji la Mbeya wameanza rasmi mafunzo maalumu ya uongozi ikiwa ni sehemu ya kukumbushwa wajibu wao kama viongozi na wawakilishi wa wananchi katika Kata wanazoziongoza ndani ya Halmashauri ya Jiji la Mbeya.

Mafunzo haya yanafanyika kuanzia leo tarehe 22/01/2026 hadi tarehe 24/01/2026 katika ukumbi wa Hotel ya G WONDER iliyopo Mbalizi Wilayani Mbeya.

Lengo la Mafunzo haya ni kuhakikisha waheshimiwa Madiwani wanapata uelewa kuhusu majukumu yao kwa upana zaidi na namna ya kuyatekeleza wakati wa kuwahudumia wananchi katika maeneo yao.

Aidha Waheshimiwa Madiwani watakuwa na wasaa mzuri wa kuelewa vyema Halmashauri na serikali za mitaa ili kuboresha utendaji kazi wa kila siku, pamoja na kusimamia vyema Halmashauri kwa kuzingatia sharia,kanuni na taratibu.

Akifungua mafunzo hayo Naibu Meya wa Halmashauri ya Jiji la Mbeya Mheshimiwa Kefas Mwasote alieleza kuwa mafunzo haya yanawapitisha kuhusiana na wajibu na mipaka ya kiongozi ili wawe pamoja.

“Hapa katikati tulienda kila mtu kivyakevyake ila sasa tutakuwa na uelewa wa namna bora ya kuongoza ndani ya Halmashauri yetu, leo tunavua ganda gumu tufukie yote yaliyopita tufanye kazi pamoja tusiwe na kundi lolote bali kundi moja tu la Halmashauri ya Jiji la Mbeya chini ya Mstahiki Meya Dormohamed Issa Rahmat na Naibu Meya wake Kefas Mwasote.

Nae Mwakilishi kutoka TAMISEMI Bi Yusta Bubinza amewapongeza Madiwani wa Jiji la Mbeya kwa kuaminiwa na kuchaguliwa kuwa viongozi kutoka katika Kata zao ndani ya Halmashauri ya Jiji la Mbeya.

Aidha ameeleza kuwa mafunzo haya yatawajengea uwezo Waheshimiwa Madiwani wa kufanya maamuzi sahihi bila kuonea mtu wakati wakutekeleza majukumu yao.