MADIWANI JIJI LA MWANZA W APATIWA MBINU ZA UBORESHAJI MAPATO

Imewekwa Tarehe: March 23rd, 2024

Baraza la madiwani wa Halmashauri ya Jiji la Mwanza limefanya ziara ya siku moja katika Jiji la Mbeya ili kujifunza namna ya kuboresha shule za msingi za mchepuo wa kiingereza na uwekezaji wa pamoja kati ya Serikali na wabia binafsi kwa lengo la kuboresha mapato ya Halmashauri.

Akizungumza wakati wa kutembelea miradi ya Shule za Msingi za mchepuo wa kiingereza na uwekezaji wa eneo la burudani na starehe(City Park) Mstahiki Meya wa Jiji la Mwanza Mhe.Sima Costantine amesema hii ni mara ya pili kufanya ziara katika Jiji la Mbeya, kwani walifanya hivyo miaka mitano iliyopita kipindi ambacho kulikuwa na shule moja ya msingi ya mchepuo wa kiingereza na baada ya ziara hiyo  walifanikiwa kujenga shule moja ya mchepuo wa kiingereza ambayo imekuwa moja ya vyanzo  muhimu vya mapato jijini Mwanza.

Mstahiki Meya wa Jiji la Mwanza ameongeza kuwa wanahitaji kuongeza idadi ya shule biashara za mchepuo wa kiingereza, hivyo wameona warudi kujifunza tena Jiji la Mbeya ambalo kwa sasa linamiliki shule tano(5) za mchepuo wa kiingereza na kulifanya Jiji la Mbeya kuwa  la mfano kwa halmashauri nyingine nchini.

“Jiji la Mbeya limefanya mapinduzi makubwa ya kiundeshaji hasa kwenye sekta hii ya elimu ya shule za mchepuo wa kiingereza lengo letu ni kuongeza idadi ya shule katika Jiji la Mwanza tumerudi tena kwa mwalimu wetu aliyetupatia mbinu za kuanzisha mradi ambao umekuwa mkubwa katika kuliingizia mapato jiji letu,”amesema Mhe. Costantine.

Aidha Mstahiki Meya huyo wa Jiji la Mwanza ameongeza kuwa Jiji hilo lina maeneo ya kutosha hivyo wamevutiwa na kuona kuna kila sababu ya kuja kujifunza juu ya uwekezaji wa pamoja kati ya Serikali na wabia binafsi kama Jiji la Mbeya linavyofanya katika uwekezaji wa mradi wa kituo cha burudani na starehe, maarufu City Park utakaogharimu zaidi ya Shilingi Bilioni Nne za kitanzania mpaka kukamilika kwake.

Mhe. Constatine ameupongeza mkataba kati ya Halmashauri ya Jiji la Mbeya na muwekezaji ambao una muda maalum wa kiuendeshaji kwa muwekezaji baada ya hapo  unakuwa chini ya miliki ya Halmashauri na kupangiwa utaratibu mwingine wa kiundeshaji kadri itakavyohitajika.

Naye Mstahiki Meya wa Jiji la Mbeya Mhe.Dormohamed Issa amesema ziara ya madiwani na watendaji wa  Jiji la Mwanza inaendelea kuwatia shime katika kubuni na kuendeleza miradi mbalimbali ya maendeleo ambayo imekuwa chachu kwa halmashari nyingine nchini kuja kujifunza.

Jiji la Mbeya kwa sasa linamiliki shule tano (5) za msingi za mchepuo wa Kiingereza ambazo ni Chief Rockert Mwashinga, (Kata ya Nsalaga), Magufuli (Kata ya Iyela), Mkapa (Kata ya Ruanda) na Azimio pamoja na Umoja(Kata ya Sisimba).