MAKAMU WA RAIS DKT. MPANGO AZINDUA KAMPENI YA UPANDAJI WA MITI RAFIKI WA MAJI MBEYA

Imewekwa Tarehe: November 17th, 2022

Makamu wa Rais wa Jamhuri ya Muungano wa Tanzania Mhe. Dkt. Philip Isdor Mpango Novemba16 , 2022 amezindua rasmi kampeni ya kitaifa ya upandaji miti rafiki wa maji kwenye vyanzo vya maji, zoezi lililofanyika katika chanzo cha maji cha Nzovwe  kata ya Mwakibete Jijini Mbeya.

Makamu wa Rais ametoa wito kwa viongozi wote wa mikoa na wilaya kuhakikisha wanafanya jitihada za ziada katika kulinda vyanzo vya maji pamoja na kukabiliana na uharibifu wa mazingira kwa kuondoa wananchi walioweka makazi katika vyanzo vya maji na kuharibu vyanzo hivyo.

Pia Makamu wa Rais amesema umefika wakati Wizara ya Ardhi kufanya upimaji wa ardhi kwa ajili ya maeneo mahususi ya ufugaji na kuondokana na ufugaji holela wa mifugo unaochangia uharibifu wa mazingira.

Makamu wa Rais amewaasa Wakulima, Wafugaji na wenye Viwanda kutambua suala la matumizi ya rasilimali maji linapaswa kuwa endelevu kwa kutochafua na kuharibu vyanzo vya maji.

Amewataka Wakala wa Huduma za Misitu Tanzania (TFS) kuongeza juhudi katika kila mkoa kutambua miti rafiki wa maji na kuwa na miche ya kutosha itakayopandwa katika vyanzo vya maji huku akiwaagiza kutoa elimu ya kutosha kwa wananchi juu ya miti rafiki ya maji na kuondokana na makosa yaliofanyika katika baadhi ya maeneo na kukausha vyanzo vya maji.

Makamu wa Rais ameagiza Wakuu wa Mikoa wote nchini kuzindua rasmi kampeni ya upandaji miti rafiki wa maji katika maeneo yao ili kufikia lengo la kupanda miti milioni 2.5 lililowekwa mwaka huu.