MKUU WA WILAYA WA MBEYA MHE. SOLOMON ITUNDA ATAKA VIKAO VYA BARAZA LA BIASHARA KUFANYIKA KWA WAKATI NA KUZITANGAZA FURSA ZA UWEKEZAJI

Imewekwa Tarehe: January 7th, 2026

Mkuu wa Wilaya ya Mbeya Mhe. Solomon Itunda amefanya kikao cha baraza la biashara kufikia maazimio mbalimbali ikiwa pamoja na kuhakikisha vikao vya baraza la biashara vinafanyika kwa wakati na kuzitangaza fursa za uwekezaji na vivutio vya utalii vinavyopatikana ndani ya Halmashauri ya Wilaya ya Mbeya.

Akizungumza na wajumbe wa Baraza hilo Mhe.Solomon Itunda amewasisitiza kuongeza jitihada za kuzitangaza fursa ikiwezekana kusafiri ndani na nje ya nchini ili kuwapata wawekezaji ambao wanaweza kuja kuwekeza katika Wilaya ya Mbeya na maeneo mengine mkoani Mbeya kulingana na uhitaji wao.

Aidha Mhe. Itunda amewataka wajumbe hao kufikisha salamu za pongezi kwa wafanyabiashara wa Wilaya ya Mbeya kwa kazi nzuri ya ujenzi wa Taifa kupitia kodi wanazolipa zimeongeza ukusanyaji wa mapato yanayotokana na ulipwaji wa ada za leseni za biashara,tozo na kodi mbalimbali wanazolipa zimepelekea mwaka wa fedha 2024/2025 kukusanya zaidi ya shilingi billioni 24.

Kwa upande mwingine Mhe. Itunda kwa niaba ya Halmashauri ya Wilaya ya Mbeya amemshukuru Rais wa Jamhuri ya Muungano wa Tanzania Mhe Dkt. Samia Suluhu Hassan kwa kutoa muongozo kwa wasaidizi wake wote kukusanya kodi na tozo mbalimbali kwa Amani na utulivu jambo ambalo limepelekea kupata matokeo mazuri ya makusanyo makubwa ya mapato kwenye Halmashauri ya Jiji la Mbeya  na Halmashauri ya Wilaya ya Mbeya zinazopatikani Wilayani Mbeya.

Vilevile Mhe. Itunda amewataka wajumbe wa kikao hicho na wananchi wa Mbeya kwa ujumla kuendelea kuitunza Amani ya nchi kwani hiyo ndiyo chachu ya maendeleo ya taifa la Tanzania ambapo amewataka endapo mtu yeyote atapata taarifa au kuona kusudio la upangaji wa uvunjifu wa Amani basi wasisite kutoa taarifa kwenye vyombo vya usalama ili viweze kuchukua hatua stahiki juu ya jambo hilo.

Akihitimisha kikao cha baraza hilo Mhe. Itunda amewasisitiza wafanyabiashara kuhakikisha wanafanya biashara zao kwa malengo waweze kupiga hatua na kuacha kufanya biashara kwa mazoea ili kuendeleza utamaduni wa kulipa kodi kwa hiari kwa kushirikiana na viongozi wa serikali Mamlaka ya Mapato nchini TRA lengo likiwa kuepusha migogoro isiyokuwa ya lazima.