MOTISHA ZATOLEWA KWA WALIMU WAKUU KWA USIMAMIZI BORA WA MIRADI

Imewekwa Tarehe: January 24th, 2025

Walimu wakuu wa shule za msingi Jiji la Mbeya wapata motisha kwakukamilisha miradi ya ujenzi na ukarabati wa miundombinu ya shule kwa fedha za mapato ya ndani kwa wakati.

Motisha hiyo imetolewa na mkurugenzi wa Halmashauri ya Jiji la Mbeya kwa walimu wakuu 10 wa Shule za msingi waliokamilisha ukarabati wa vyumba vya madarasa, ujenzi wa vyumba vipya vya madarasa na ujenzi wa matundi ya vyoo kwa wakati.

Akikabidhi motisha hizo leo tarehe 24 mwezi wa kwanza 2025 katika ukumbi wa Mkuu wa Wilaya ya Mbeya kwa niaba ya Mkurugenzi wa Jiji Afisa elimu msingi wa Jiji la Mbeya Mwl. Anderson Mwalongo amewapongeza walimu wakuu wote kwa usimamizi mzuri wa miradi, huku akiwataka walimu wanaoendelea na ujenzi kukamilisha usimamizi huo ili kuendana na wakati.

Aidha Mwl. Mwalongo amewaambia walimu wakuu kua ukamilishaji wa miradi kwa wakati unatufanya tutimize makusudio ya Rais wetu wa Jamhuri ya Muungano wa Tanzania Mhe. Dkt. Samia Suluhu Hassan, Mbunge wetu wa Jiji la Mbeya Mhe. Dkt. Tulia Ackson pamoja na Balaza la Madiwani chini ya Mstahiki Meya Mhe. Dormohamed Issa Rahmat na Mkurugenzi Bw. John John Nchimbi.

Nae Mwl. Abdallah Ally mratibu wa miradi Shule za msingi akimkaribisha Afisa elimu amewapongeza walimu hao kwa usimamizi mzuri wa miradi huku akiwapa changamoto walimu wengine ambao hawajapata motisha waendelee kupambana kwenye usimamizi wa miradi ili na wao siku moja wawe sehemu ya wapewa motisha.

Katika kuhakikisha miundombinu ya Shule ya msingi inaimarika, Mkurugenzi wa Halmashauri ya Jiji la Mbeya katika kipindi cha mwaka wa fedha 2024-2025 amepeleka jumla ya shilingi 1,090,000,000 katika shule 25 za msingi za Halmashauri ya Jiji la Mbeya kwaajili ya ujenzi wa vyumba 16 vya madarasa, ukarabati wa vyumba 58 vya madarasa na ujenzi wa matundu 80 ya vyoo.