RASMI JIJI LA MBEYA LASITISHA USAJILI WA BAJAJ

Imewekwa Tarehe: January 31st, 2023

Halmashauri ya Jiji la Mbeya imesitisha usajili na maboresho ya usajili wa pikipiki ya matairi matatu maarufu Bajaji kufuatia kuwepo kwa mrundikano wa vyombo hivyo vya moto usiozingatia sheria za usalama barabarani na baadhi kuhusishwa na matukio ya uhalifu.

Akiongea wakati wa kulitangaza azimio hilo Mstahiki Meya wa Halmashauri ya Jiji la Mbeya Mh.Dormohamed Issa amesema Baraza lililoketi katika kikao chake cha robo ya pili kusitisha usajili wa Bajaji kutokana na sababu za sheria za usalama barabarani na baadhi kuhusishwa na matukio ya uhalifu pia kumekuwa na udanganyifu kwa baadhi ya wamiliki kutumia namba za usajili wa bajaji za zamani kwa bajaji mpya jambo ambalo ni kinyume cha sheria

Aidha Mstahiki Meya amefahamisha kuwa zoezi hilo la kusitisha usajili wa Bajaji litakoma pale mradi wa ujenzi wa barabara ya njia nne unaotarajia kuanza hivi karibuni kukamilika kwa vile katika mradi huo kutakuwa na njia za bajaji na bajaji nyingine zitakuwa zimechoka kwa namna moja ama nyingine msongamano na changamoto nyingine zinazotokana na vyombo hivyo vya moto zitakuwa zimefikia kikomo.

Hoja ya kuondosha changamoto na kero zitokanazo na Bajaji kwenye kikao cha robo ya pili ya Baraza la madiwani Halmashauri ya Jiji la Mbeya iliwasilishwa na Diwani wa Kata ya Nsalaga Mchungaji David Ngogo ambaye alieleza bayana kuwa baadhi ya vyombo hivyo na waendeshaji wake wamekuwa wakituhumiwa kujihusisha na vitendo vya uhalifu,uvunjaji wa sheria za barabarani na vitendo vya ubakaji.

Nae Kaimu Mkurugenzi wa Halmashauri ya Jiji la Mbeya Wakili Triphonia Kisiga amesema kusitisha usajili wa bajaji kumeanza muda mrefu ila kwasasa Baraza la Madiwani limeamua kusisistiza hivyo kama watendaji tutakwenda kulisimamia ipasavyo utekelezaji wa zoezi hilo umetokana na maelekezo ya kamati ya ulinzi na usalama.