RASMI MAZIWA SEKONDARI JIJINI MBEYA KUWA YA WASICHANA KUANZIA JANUARI 2024

Imewekwa Tarehe: March 24th, 2023

Halmashauri ya Jiji la Mbeya inaibalidisha Shule ya Sekondari Maziwa kuwa ya wasichana kuanzia kidato cha kwanza hadi cha sita kuanzia Januari 24 mwaka 2024 na kufanya Jiji kuwa na shule Mbili za wasichana ikitanguliwa na Shule ya sekondari ya Wasichana Loleza.

Akiongea na waandishi wa habari Afisa elimu Sekondari wa Jiji la Mbeya Bi.Matilda Luvanda amesema mipango ya kuibadilisha shule hiyo kuwa ya wasichana imekamilika na ujenzi wa Mabweni unaendelea huku mafundi wakiwa kwenye hatua ya kuweka malumalu.

Afisa elimu huyo ameendelea kufafanua kuwa kwasasa shule hiyo ni mchanganyiko, wanafunzi wavulana waliopo watapungua ama kuondoka kadiri watakavyokuwa wanahitimu kidato cha nne hivyo baada ya miaka mitatu watakuwa wamemalizika na usajili utakaoanzia mwakani ni kwa wasichana pekee.

Matilda ameongeza kuwa shilingi milioni 350 fedha zilizotokana na mapato ya ndani ya Halmashauri ya Jiji la Mbeya zinaendelea kukarabati miundombinu mingine ya shule na ujenzi wa mabweni yatakayotumiwa na wanafunzi wasichana watakaojiunga na shule hiyo kuanzia mwakani.

Wanafunzi wasichana watakaojiunga na shule hiyo ni wale watakaofanya vizuri kweye mitihani yao ya kuhitimu darasa la saba kutoka Mbeya Jiji na wanafunzi watakao jiunga na kidato cha tano  kutoka shule mbalimbali nchini wakiwa na wastani mzuri wa ufaulu kwenye mitihani ya kidato cha nne.

Halmashauri ya Jiji la Mbeya inakwenda kuwa na shule ya pili ya wasichana ya serikali ambapo awali kulikuwa na shule moja ya wasichana Loleza ambayo ilijengwa na kuanza kazi tangu enzi ya ukoloni ikiwa imefundisha wanafunzi wengi viongozi na mashuhuli akiwemo Spika wa Bunge la Jamhuri ya Muungano wa Tanzania Mh.Dkt. Tulia Ackson.