RC HOMERA AWAOMBA VIONGOZI WA DINI KULIOMBEA TAIFA

Imewekwa Tarehe: July 25th, 2023

Mkuu wa Mkoa wa Mbeya Mhe. Juma Homera amewaomba viongozi wa dini kuendelea kuliombea taifa ili amani.umoja na mshikamano viendelee kudumu kwa maslahi ya nchi,wananchi,kizazi cha sasa na kijacho.

Akizungumza kwenye hafla ya maadhimisho ya siku ya mashujaa yaliyofanyika kimkoa katika viwanja vya makaburi ya Mashujaa vilivyopo Jijini Mbeya amesema pamoja na viongozi wa dini wananchi bila kujali itikadi zao wanapaswa kuilinda misingi ya amani iliyopo itakayotoa fursa nzuri kwa watoto na vijana kupata elimu bora,kujifunza maadili mema na kusimamia mila na desturi zetu.

Mh.Homera ameongeza kuwa pamoja na kuiombea nchi viongozi wa dini na wananchi wanapaswa kuendela kumuombea Rais wa Jamhuri ya Muungano wa Tanzania Mh.Dkt Samia Suluhu Hassan kwa kazi kubwa ya kizalendo anayoifanya katika kuleta maendeleo hasa kwenye Mkoa wa Mbeya kwa kuleta mradi mkubwa wa barabara ya njia nne mradi mkubwa wa Maji Kiwira na barabara ya mchepuko kutoka Mlima Nyoka mpaka Songwe ambayo mkataba wake ulisainiwa Mei 16 2023 Jijini Dodoma.

Pamoja na viongozi wa dini Mkuu wa Mkoa Mh.Juma Homera amewaomba viongozi wa kimila kwa imani yao kuliombea taifa na kumuombea Mh.Rais Dkt Samia Suluhu Hassan ambaye ni kiongozi wa machifu nchini ambaye amepewa jina la Chifu Hangaya.

Kila mwaka ifikapo Julai 25 Tanzania inaadhimisha kumbukumbu ya mashujaa waliolipigania taifa mpaka kupatikana uhuru wa Tanganyika Desemba 9 1961 na baadae kuzaliwa Jamhuri ya Muungano wa Tanzania mnamo April 26 1964.