RC MALISA AGAWA MADAWATI JIJI LA MBEYA

Imewekwa Tarehe: October 25th, 2025

Mkuu wa Mkoa wa Mbeya Mhe. Beno Malisa amezindua na kukabidhi Madawati 1000 kwa Shule za msingi jijini Mbeya ikiwa ni katika kutimiza mpango wa kukabidhi madawati 2,222 kwa shule 15 huku shule za Sekondari zikinufaika kwa kupatiwa  madawati 526, hayo yamefanyika leo tarehe 25.10.2025 katika Shule ya msingi Hasangailiyopo Kata ya Uyole.

Akizinduwa madawati hayo Mhe. Malisa amesema serikali inalenga kuhakikisha wanafunzi hawakai chini kwa kukosa madawati ya kukalia wakati wa masomo hivyo amewataka wazazi kushirikiana na serilikali katika kuwasisitiza wanafunzi wanayatunza madawati hayo ili yaweze kudumu na kutumika kwa kipindi kirefu ili kupunguza gharama za utengenezaji wa madawati kila mara kwani fedha hizo zinatokana na kodi za wanachi ambao ni wazazi na walezi wa wananfunzi wengi Mkoani Mbeya.

“Niwaombe wazazi muendelee kuwasisitiza watoto kwa kuwa fedha hizi zinazoleta maendeleo ni sehemu ya tozo mbalimbali zinazozalisha haya, kwahiyo tuwahimize watoto wetu watunze wahakikishe dawati hilo linadumu”. Amesema Malisa

Aidha Mhe. Malisa amemshukuru Mkurugenzi wa Jiji la Mbeya Bwa. Justice Kijazi kwa kuhakikisha wafanyabiashara wa Jiji la Mbeya wanaendelea kulipa tozo za biashara zao kwani matokeo ya tozo hizo yanaonekana kwa vitendo.

Akitoa taarifa fupi ya utengenezaji wa Madawati hayo Mkurugenzi wa Jiji la Mbeya Bw. Justice Kijazi amesema Halmashauri ya Jiji la Mbeya katika mwaka wa Fedha 2025/2026 imepanga kutumia fedha Asilimia 70 ya mapato ya ndani yasiyofungwa kwaajili ya utekelezaji wa miradi mbalimbali ya maendeleo.

Halmashauri ya Jiji la Mbeya katika kipindi cha robo ya kwanza imefanikiwa kutoa kiasi cha shilingi billioni 4,483,284,522.9/= ambazo zimeelekezwa katika mfuko wa Vijana, Wanawake na wenye ulemavu, Shule za msingi, Shule za Sekondari na Vituo vya afya, Malipo ya fidia ya ardhi ambayo imepimwa, Matumizi ya lishe mashuleni pamoja na Utengenezaji wa Madawati, Viti na Meza.

Akihitimisha hotuba yake Mhe. Malisa amewaomba wananchi wa Mkoa wa Mbeya kuhakikisha tarehe 29, Octoba 2025.wanajitokeza kwa wingi kupiga kura, huku wakizingatia Amani na utulivu wakati wote wa uchaguzi ili kuendelea kuilinda Amani ya Taifa letu.