WANANCHI WATAKIWA KURIPOTI MATUKIO YA UKATILI WA KIJINSIA

Imewekwa Tarehe: May 15th, 2024

Wananchi wa Wilaya ya Mbeya na Mkoa kwa ujumla wametakiwa kuacha tabia ya kumaliza changamoto za masuala ya ukatili wa kijinsia kifamilia ili kukomesha matukio ya aina mbalimbali za ukatili kwenye jamii.

Akizungumza katika maadhimisho ya siku ya familia duniani yaliyofanyika kwenye Stand ya mabasi Mamlaka ya Mji Mdogo Mbalizi Mkuu wa Wilaya Mbeya Mhe.Beno Malisa ambaye amemuwakilisha Mkuu wa Mkoa Mhe.Juma Homera amewataka wananchi kufikisha mambo hayo kwenye maeneo husika ili kufanikisha kutokomeza tabia hiyo inayoweza kupekelea kuwa na kizazi katili endelevu.

Mheshimiwa Malisa ameendelea kuwasihi wananchi kujitahidi kumaliza tofauti zilizopo kwa amani ili kuboresha ustawi wa watoto na familia kwa mujibu wa tafiti mbalimbali za masuala ya ukatili zinaonesha baadhi ya matukio yanasabishwa na visasi vinavyotokana na kushindwa kutatua changamoto zinazowakabili kati yao.

Aidha Malisa amefafanua kuwa hali ya ukatili ujitokeza panapokuwa na migogoro ya kifamiliakwa wazazi kushindwa kuelewana na kuzalisha watoto wa mitaani wanaoishi kwenye mazingira magumu na kupelekea kuzalisha makundi ya uhalifu katika jamii.

“Nawaomba wananchi amani na upendo vitawale na muweze kumaliza tofauti zenu kifamilia bila migogoro na matatizo kwa watoto”Amesema Mkuu wa Wilaya Mh.Beno Malisa.

Kwa upande wake Mwenyekiti wa Shujaa wa Maendeleo na Ustawi wa Jamii Tanzania SMAUJATA Wilaya ya Mbeya Bw.Joseph Lusoko amesema matukio ya ukatili kwasasa yanatolewa taarifa tofauti na siku za nyuma jambo ambalo linaonesha kiwango cha elimu na uelewa juu ya mapambano dhidi ya ukatili kimeongezeka.

Maadhimisho ya Siku ya Familia ufanyika kila mwaka ifikapo tarehe 15 Mei ambapo mwaka huu yamebebwa na kaulimbiu isemayo “Tujaribu kumaliza tofauti zetu ndani ya familia ili ustawi wa watoto na familia zetu uwe mkubwa”.