WATOTO MIA SITA ELFU (600.000) KUPATIWA CHANJO YA POLIO NKOANI MBEYA

Imewekwa Tarehe: September 15th, 2023

Mkuu wa Mkoa wa Mbeya, Juma Homera amesema watoto zaidi ya 614,346 wanatarajia kupatiwa chanjo ya matone ya polio kuanzia September 21 mpaka 24 mwaka huu.

Homera amesema leo Septemba 15,2023 wakati akifungua mafuzo ya Kamati ya Msingi ya Afya ngazi ya Jamii (PHC) yaliyofanyika katika ukumbi wa ofisi ya Mkuu wa Mkoa.

Amesema kuwa Mkoa wa Mbeya uko katika hatari ya kuibuka kwa ugonjwa wa polio kufuatia kuwepo kwa kirusi aina ya type 2 kilichobainika nchini Malawi.

“Hata Waziri wa Afya Ummy Mwalimu akiwa ziara yake aliutaja Mkoa wa Mbeya kuwa ni miongoni mwa mikoa ambayo iko kwenye hatari ya kuibuka kwa ugonjwa wa polio hivyo kuna kila sababu ya kujipanga hususan katika maeneo ya mipakani ”alisema.

Homera amewataka Waganga wakuu,Wakurugenzi kuhakikisha watoto wote wenye umri kati ya 0 mpaka miaka 8 wanapata chanjo ya polio na kufika mpaka maeneo yasiyo fikika .

Kwa upande wake Kaimu Mganga Mkuu wa Mkoa, Dk Elizabeth Nyemi amesema Shirika la Afya Duniani (WHO,) limetoa zaidi ya Sh 1.3 bilioni kwa ajili ya  kuendesha zoezi la chanjo kwa kuzifikia halmashauri zote kwenye vijiji 764  ikiwepo usafiri na posho za wataalam.

Mwakilishi wa Wizara ya afya,Zainab Ngamungumi amesema katika utoaji wa chanjo katika maeneo ya mipakani utawekwa utaratibu wa kutoa chanjo kwa watoto walio na umri kati ya 0 mpaka miaka 8.