WILAYA YA MBEYA YAGAWA VITAMBULISHO MIA MOJA ISHIRINI NA NANE ELFU (128,000) DC MALISA ATOA ANGALIZO

Imewekwa Tarehe: December 14th, 2023

Mkuu wa Wilaya ya Mbeya Mh.Beno Malisa amewataka wananchi kuepuka matumizi mabaya ya vitambulisho vya taifa wanavyopatiwa ili kuepuka kukutwa na makosa ya jinai yanayoweza kupelekea kifungo gerezani.

Mh.Beno Malisa ameyazungumza hayo kwenye hafla ya uzinduzi wa awamu ya pili ya ugawaji wa vitambulisho vya taifa uliofanyika kwenye uwanja wa shule ya Msingi Ruanda Nzovwe Jijini Mbeya ambapo vitambulisho vya taifa 128,000 vitagaiwa kwenye Halmashauri mbili zilizopo kwenye Wilaya ya Mbeya.

Kwa upande wake Afisa Msajili wa Mamlaka ya vitambulisho vya Taifa (NIDA)Mkoa wa Mbeya Bi.Alavuya Ntalima amesema kwa awamu hii vitambulisho 128,000 vinataraji kugaiwa kwa wananchi wa Wilaya ya Mbeya  ambapo awali vitambulisho 184,000 vilitolewa na kufanya jumla ya vitambulisho 312,000 kutolewa tangu zoezi la kujiandikisha lilipoanza mwaka 2016.

Afisa Msajili wa Mamlaka ya vitambulisho vya Taifa (NIDA)Mkoa wa Mbeya amewata wananchi kuchangamkia fursa hiyo ya kuchukua vitambulisho kwenye Kata zao ndani ya siku 14 baada ya hapo vitambulisho vyote vitarudishwa kwenye ofisi za mamlaka hiyo zilizopo Mbeya mjini hali inayoweza kuzaa usumbufu kwao kulingana na jiografia ya Wilaya ya Mbeya.

Mussa Ngeleza mkazi wa Kata ya Ilomba Jijini Mbeya ameeleza furaha yake baada ya kupata kitambulisho hicho alichokisubiri tangu mwaka 2018 na changamoto za kukwama kufanikisha mambo mengi yaliyohitaji kitambulisho hicho mpaka pale ilipotangazwa kuwa unaweza kutumia namba na kufanikisha kutumia mifumo yote inayohitaji kitambulisho hicho.

“Nilikuwa napata changamoto pale kinapohitajika kitambulisho cha taifa kwenye mifumo kwa sasa nina furaha mpaka nashindwa kuongea asante sana Mh.Rais Dkt Samia Suluhu Hassan kwa kufanya mambo yamekuwa rahi” Mussa Ngeleza Mkazi wa Jiji la Mbeya.

Uzinduzi wa ugawaji wa vitambulisho vya taifa ngazi ya Mkoa ulifanywa na Mkuu wa Mkoa wa Mbeya Mh.Juma Homera hivi karibuni kwasasa zoezi hilo linaendelea kwenye Wilaya zote tano.