MTIHANI WA KUHITIMU DARASA LA SABA

Mtihani wa kumaliza Elimu ya Msingi kwa mwaka 2017 umepangwa kufanyika kuanzia tarehe 06/09/2017 siku ya jumatano hadi tarehe 07/09/2017 siku ya Alhamisi.

Halmasghauri ya Jiji la Mbeya ina shule za msingi 84 zenye watahiniwa wa Mtihani huu, ambapo jumla ya watahiniwa wote ni 9781, kati yao wavulana ni 4629 na wasichana ni 5152, watahiniwa wa kawaida wavulana 4286 na wasichana 4835 na watahiniwa wa mfumo wa kiingereza wavulana 329 na wasichana 310, watahiniwa wenye uoni hafifu wavulana 14 na wasichana 7, Mikondo iliyopo ni 427 ambapo shule 84 zimegawanywa kwenye misafara 20 ili kurahisisha kazi ya kusambaza na kukusanya mitihani.

Shule za msingi 84 zenye watahiniwa wa mtihani huu zimetembelewa na wajumbe wa kamati ya uendeshaji wa mtihani katika ngazi ya Halmashauri kuanzia Tarehe 14/08/2017 hadi Tarehe 17/08/2017, mambo yafuatayo yalikaguliwa:

• Uwepo wa kasiki salama na madhubuti itakayotumika kuhifadhia mitihani.
• Uwepo wa penseli za HB za kutosheleza zitakazotumiwa na watahiniwa katika mtihani.
• Uwepo wa vifutio vya kutosheleza.
• Uwepo wa madawati ya kukizi idadi ya watahiniwa katika shule husika.
• Maandalizi ya chai na chakula cha mchana kwa watahiniwa na wasimamizi.
• Uwepo wa saa Za ukutani zitakazotosheleza idadi ya mikondo iliyopo.
• Kufunikwa vielelezo vyote vilivyochorwa ukutani ndani na nje ya madarasa.
• Uwepo wa Mkasi kwa kila Mkondo.

Shule zote zilizokaguliwa zimeendelea kuandaa vifaa hivyo kwa kuzingatia maagizo ya kamati , aidha Semina ya maelekezo ya  usimamizi wa Mtihani kwa wasimamizi wapatao 511 na wakuu wa msafara 25 imefanyika kwa siku mbili, siku ya ijumaa tarehe 25/08/2017 na siku ya Jumamosi tarehe 26/08/2017 kwenye ukumbi wa shule ya Sekondari Mbeya.