DC MALISA ATOA ONYO KALI KWA WAPOTOSHAJI JIJINI MBEYA

Imewekwa Tarehe: February 7th, 2023

Mkuu wa Wilaya ya Mbeya Mheshimiwa Beno Morris Malisa ametoa onyo kali kwa watu wote wanaojihusisha na mambo ya kupotosha umma katika masuala mbalimbali katika Wilaya ya Mbeya.

Ameyasema hayo alipotembelea Shule ya Sekondari ya Sinde mara baada ya kusambaa kwa picha katika mitandao ya kijamii zinazowaonyesha wananfunzi wakiwa wamekaa chini darasani.

“Katika tukio mlioliona leo na uhalisia mliojionea ndugu wanahabari na viongozi nilioambatana nao ni upotoshaji kwa asilimia mia moja na moja kwa moja lina viashiria vyenye lengo la kukinzana na juhudi za serikali, utekelezaji wa Ilani ya Chama cha Mapinduzi na hasa maono ya Rais wetu Dkt. Samia Suluhu Hassan ambaye ana dhamira ya dhati ya kuinua elimu ya nchi hii na amefanya kwa vitendo kama ambavyo madarasa yanavyoonekana madawati yanavyoonekana na dhana nzima la elimu bure kwa sekondari na kwa msingi hivyo nitoe wito kwa vijana wote ilihali wapo kwenye taaluma za mafunzo kuepuka kabisa vitendo hivi vya upotoshaji dhidi ya juhudi za maendeleo za serikali, hatua za kinidhamu zitafuata kwa wanaoendeleza tabia hizi niwaombe na kuwataka  wawe na mioyo na dhamira ya kuisaidia serikali na wawe chachu ya serikali kuwaletea maendeleo wananchi wake na wanafunzi badala ya kuwa wapinzani”. Alisema DC Malisa

Nae Diwani wa Kata ya Sinde Mheshimiwa Fanuel Kyanula katika maelezo yake alielezea kuwa kilichotokea ni upotoshaji na aliyefanya tukio hilo alikuwa na nia ovu kwani siku moja kabla ya tukio mtuhumiwa huyo aliwatoa wananfunzi madarasani kwa lengo la kuandikisha majina ya wanafunzi hao  katika Madawati kumbe lengo lake lilikuwa kuwapiga picha wanafunzi hao ili ionekane shule hiyo haina Madawati wakati tatizo la Madawati halipo shuleni hapo.

Akielezea hatua zilizochukuliwa Kaimu Mkurugenzi wa Halmashauri ya Jiji la ambeya Wakili Triphonia Kisiga ameeleza ofisi yake tayari imeshamsimamisha Mwalimu huyo na kwakuwa alikuwa mwalimu wa kujitolea shuleni hapo ofisi yake itamwondoa shuleni asiendelee tena na mafunzo yake kwani hana nia nzuri na maadili ya kazi.

Mpaka sasa kijana huyo bwana Evarist Chonya anashikiliwa na jeshi la Polisi kwaajili ya uchunguzi wa tuhuma zinazomkabili na mara baada ya uchunguzi kukamilika atafikishwa mahakani.