HALMASHAURI YA JIJI LA MBEYA IMEELEKEZWA KUANZISHA MKAKATI WA KUTOA ELIMU YA LISHE KWA WANAFUNZI.

Imewekwa Tarehe: October 22nd, 2022

Halmashauri ya jiji la Mbeya imeelekezwa kuanzisha mkakati wa kutoa elimu ya lishe bora kwa wanafunzi kuanzia darasa la tatu kwa shule zote za msingi za jiji na Wilaya ya Mbeya kiujumla hii ni kutokana  na kushika nafasi ya pili kimkoa kwenye suala la lishe.

Akitoa maelekezo hayo kwenye hafla ya utiaji saini mkataba  wa utekelezaji wa shughuli ya lishe kati ya Mkurugenzi wa Jiji la Mbeya na Watendaji wa Kata zote 36 za jiji la Mbeya Mkuu wa Wilaya ya Mbeya Mh.Dr.Rashid Chuachua ameeleza kuwa kulingana na tamaduni na tabia za makabila ya Mbeya wanawake ni wajasiriamali muda mwingi wanakuwa kwenye harakati za kujitafutia kipato hali inayopelekea watoto kuwaandalia chakula watoto wenzao hivyo kuwapa elimu ya maandalizi ya chakula bora itafanikisha kuondoa tatizo hilo la utapiamlo na udumavu kwenye jamii.

“Tukiwafundisha watoto kuanzia ngazi ya msingi ili kuwaandaa watoto hao ni kutambua namna bora ya kuandaa lishe, hii ni kutokana na baadhi ya wazazi kutokuwa na muda wa kuandaa chakula nyumbani na badala yake watoto ndio wenye jukumu la kupika wawapo nyumbani” Mkuu wa Wilaya ya Mbeya Dr.Rashid Chuachua.

Aidha Mkuu huyo wa Wilaya amemuagiza afisa lishe wa halmashauri ya Jiji la Mbeya Amani Mwakipesile kuchagua wahudumu wa afya katika mitaa yote Jijini ambao watatambuliwa na halmashauri na watafanya majukumu yote ya kazi zinazohusu afya katika jamii likiwemo suala la lishe bora kwa kutoa elimu bila kujali rika.

Naye mwakilishi wa Mkurugenzi wa halmashauri ya Jiji la Mbeya Annamary Joseph amesema wamepokea maelekezo yaliyotolewa na Mkuu Wa Wilaya Dr.Rashid Chuachua na wanakwenda kuyafanyia kazi kwa vile kuwepo kwa utapiamlo katika jamii hasa ya Wilaya zilizopo kwenye Mkoa wa Mbeya ni aibu kwavile Kuna kila aina ya chakula ambacho kinaweza kupambana na udumavu na utapiamlo.

Kwa upande wa watendaji wa kata na mitaa,  Faraja Wila kutoka  kata ya Iganjo na Furaha Malele kutoka mtaa wa Ilomba, jijini Mbeya wamesema wanakwenda kutekeleza agizo hilo ili watoto wapate kuelewa  wa namna vyakula vya lishe vinavyoandaliwa .

Rais wa Jamhuri ya Muungano wa Tanzania Mh.Samia Suluhu Hassan Septemba 30 alikuwa mgeni rasmi kwenye hafla iliyoratibiwa na ofisi ya Rais-TAMISEMI ya utiaji saini mkataba wa usimamizi wa shughuli za lishe iliyofanyika kwenye viwanja vya ukumbi wa mikutano wa Jiji la Dodoma uliopo Mtumba.