HALMASHAURI YA JIJI LA MBEYA YATENGA MILIONI 82 KUPAMBANA NA UDUMAVU

Imewekwa Tarehe: February 23rd, 2023

Halmashauri ya Jiji la Mbeya imetenga kiasi cha shilingi milioni themanini na mbili (82,000,000/=) kwa ajili ya upimaji na utekelezaji wa mkataba wa afua za lishe ili kukabiliana na tatizo la udumavu kwenye shule za sekondari na msingi mpango ambao unafanywa kwa pamoja na Jiji la Zurich la nchini Uswisi.

Akiongea kwenye kikao kazi cha pamoja kati ya madiwani na watendaji wa Halmashauri ya Jiji la Mbeya Mstahiki Meya wa Jiji la Mbeya Mhe.Dormohamed Issa amesema katika mwaka wa fedha 2022/2023 Halmashauri ilitenga kiasi cha shilingi milioni 80 sawa na shilingi elfu moja (1,000/=) kwa kila mtoto wa chini ya miaka mitano.

Aidha Mstahiki Meya ameongeza kuwa kwa kuzingatia umuhimu wa chakula na lishe bora mashuleni ikiwa mpango wa kupambana na udumavu kwa mwaka wa fedha 2023/2024 Halmashauri ya Jiji la Mbeya limetenga kiasi cha shilingi milioni themanini na mbili (82,000,000/=) kwa ajili ya shughuli za lishe.

Mh.Dormohamed Issa amewataka Madiwani na watendaji kuhamasisha jamii kushiriki katika mpango wa utoaji chakula mashuleni,kuhakikisha zoezi la siku za afya na lishe za mtaa zinafanyika kulingana na muongozo,kuchochea na kuibua fursa za kilishe ili kupata suluhu za kutatua matatizo ya kilishe kwenye jamii.

Pamoja na hayo Madiwani na watendaji Kata wametakiwa kufanya tathimini na kujadili taarifa za lishe kwenye mitaa pamoja na kuhakikisha wadau wa lishe wote waliopo katika Kata wanatambulika na kuwasilisha taarifa zao na kufuatilia utekelezaji wa shughuli za lishe na kuifanya lishe kuwa ajenda ya kudumu ndani ya vikao vya Kamati ya Maendeleo ya Kata (KAMAKA).

Mstahiki Meya wa Jiji Mh.Dormohamed Issa amefafanua kuwa mkataba wa lishe na mapamabano dhidi ya Udumavu watahakikisha unatekelezwa kikamilifu kwa vile ni agizo la Rais wa Jamhuri ya Muungano wa Tanzania Mh.Dkt.Samia Suluhu Hassan alilolitoa katika mkutano mkuu wa sita wa kitaifa wa tathimini ya utekelezaji wa mkataba wa lishe mnamo tarehe 30.09.2022 Jijini Dodoma.

Mradi wa IC4N utaongeza nguvu na kufikia malengo ya mapambano dhidi ya Udumavu Halmashauri ya Jiji la Mbeya kwa kushirikiana na Jiji la Zurich nchini Uswisi wanakusudia kusaini makubaliano ya awali ya kutekeleza mradi wa lishe ambapo Jiji la Mbeya litakuwa mnufaika mkuu kwa kusaidi juhudi za kuboresha na kuimarisha mifumo ya chakula kwa wakazi Jiji hili.