JIJI LA MBEYA LATUMIA BIL 1.5 KUBORESHA MIUNDOMBINU YA ELIMU MSINGI NA KUJENGA SHULE MBILI MPYA

Imewekwa Tarehe: September 19th, 2023

Halmashauri ya Jiji la Mbeya imetumia zaidi ya shilingi bilioni 1.5 kukarabati miundombinu ya shule za masingi na awali sambamba na kujenga shule mbili mpya kwenye Kata za Ilomba na Ilemi kupitia mradi wa kusaidia uboreshaji wa miundombinu ya shule za msingi na awali (BOOST).

Akizungumza na wananchi wakati wa ziara yake ya kukagua miradi ya maendeleo Mstahiki Meya wa Jiji la Mbeya Mh.Dormohamed Issa amesema Halmashauri ilipokea zaidi ya shilingi bilioni 1.5 , kupitia fedha hizo baraza la madiwani lilipitisha kiasi cha shilingi 1,077,000,000. kujenga shule mpya mbili ambazo zinajumuisha miundombinu ya elimu ya msingi na awali kila moja ikigharimu milioni 538,500,000.

Mstahiki Meya ameendelea kufafanua kuwa kiasi kilichobaki kilijenga madarasa ya mfano elimu msingi na awali kwenye baadhi ya shule zilizo na changamoto katika sekta ya elimu.

“Tumeangalia vigezo katika Kata hizo kulikuwa na idadi kubwa ya wanafunzi ,ambayo ilisababisha msongamano wa wanafunzi kwenye vyumba vya madarasa na kusababisha utoro ,wanafunzi kushindwa kusoma kwa bidii na walimu kushindwa kufundisha kwa weredi” amesema Mstahiki Meya.

Mh.Dormohamed ameishukuru serikali ya awamu ya sita iliyochini ya Rais Samia Suluhu Hassan sambamba na Spika wa Bunge la Jamhuri ya Muungano wa Tanzania na Mbunge wa Jimbo la Mbeya mjini Mh.Dkt. Tulia Ackson kwa kuishawishi serikali kuleta miradi mbalimbali ya Maendeleo katika Jiji la Mbeya.

Aidha Mstahiki Meya ametumia fursa hiyo kuwahimiza wazazi na walimu kusimamia utunzaji wa miundombinu hiyo kwa vile serikali imewekeza fedha nyingi isije ikatokea baada ya muda mfupi kufanyike uharibifu hilo halitakubalika.

Diwani wa Kata ya Ilemi Jijini Mbeya Ladislaus Magoma amesema kuwa ujenzi wa miradi ya elimu ni utekelezaji wa Ilani ya uchaguzi ya mwaka 2020/2025 kwa serikali ya awamu ya sita kwa ujenzi huu wa shule mbili ni ukombozi kwani awali kulikuwa na changamoto ya msongamano wa wanafunzi kwenye vyumba vya madarasa.