KAMATI YA MIPANGO MIJI NA MAZINGIRA YAFANYA ZIARA MIRADI YA UJENZI WA BARABARA

Imewekwa Tarehe: April 16th, 2024

Kamati ya Mipango Miji na Mazingira ya Halmashauri ya Jiji la Mbeya,imefanya ziara ya  kukagua maendeleo ya ujenzi wa barabara zilizopo kata za Ghana na Isanga, jijini humo.

Ziara hiyo imefanyika leo tarehe 16 Aprili, 2024 ikiongozwa na Mwenyekiti wa Kamati hiyo Mhe. Mwajuma Tindwa ambaye amesisitiza umuhimu wa watendaji wa Halmashauri kusimamia miradi hiyo kwa karibu ili imalizike kwa wakati.

Awali akizungumza kwa niaba ya Mkurugenzi wa Jiji Bi. Annamary Joseph amesema Halmashauri ya Jiji la Mbeya imekuwa ikitekeleza miradi mbalimbali ya Jiji ili kwenda sambamba na kasi ya Mhe. Rais wa Jamhuri ya Muungano wa Tanzania Mhe. Dkt. Samia Suluhu Hassan ya kuwaondolea kero wananchi.

Kwa upande wake Mhandisi wa Halmashauri ya Jiji la Mbeya Eng.Leonard Mosea amesema Jiji limepokea maelekezo yaliyotolewa na Kamati na kuahidi kufuatilia ukamilishwaji wa miradi mbalimbali ikiwemo ya barabara.

Amesema ujenzi wa barabara ya Iziwa iliyopo kata ya Ghana yenye urefu wa kilomita 2  inayotarajiwa kukamilika  ifikapo Februari 2025 na barabara ya Mbwiga iliyopo kata ya Isanga  yenye urefu wa kilomita 0.55 inayotarajiwa kukamilika ifikapo  mwezi Juni, 2024.

Pamoja na ujenzi wa barabara hizi, Halmashauri ya Jiji la Mbeya inatekeleza Programu ya TACTIC awamu ya kwanza, inayofadhiliwa na Benki ya Dunia kwa gharama ya Shilingi Bilioni 21. Barabara zinazofadhiliwa na programu hii ni pamoja na barabara ya  Uyole- Itezi (KM. 1.8), Block T- SIDO (KM.1.2), Ilomba- Machinjioni (KM. 3.8) na barabara ya Kalobe (KM. 3.5) ambazo ujenzi wake uko katika hatua mbalimbali.