KAMATI YA ULINZI NA USALAMA WILAYA YA MBEYA IMEPANGA KUANZA OPERESHENI YA KUKAMATA WANAOHARIBU VYANZO VYA MAJI

Imewekwa Tarehe: October 28th, 2022

Kamati ya ulinzi na usalama Wilaya ya Mbeya imepanga kuanza kufanya operesheni ya kukamata wanaoharibu vyanzo  vya maji  kwenye safu ya milima Mbeya kuanzia tarehe 5 Novemba mwaka huu kufuatia kutoweka kwa vyanzo vingi vya maji.

Akitoa maelekezo  baada ya kupewa nafasi na Mstahiki Meya wa Halmashauri ya Jiji la Mbeya Mh.Dormohamed Issa kwenye kwenye kikao cha baraza la madiwani, Mwenyekiti wa kamati ya ulinzi na usalama  ambaye ni Mkuu wa Wilaya ya Mbeya Dkt.Rashid Chuachua amesema  operesheni hiyo inalenga kudhibiti  uharibifu wa mazingira unatokana na kuchepushwa kwa mikondo ya vyanzo vya maji na kuchomwa moto kwa uotowa asili unaotunza vyanzo vya maji unaoendelea kutokea katika baadhi ya maeneo ya mlima Mbeya.

Aidha huyo wa Mkuu wa Wilaya amewasisitiza madiwani wa Halmashauri ya Jiji la Mbeya kuunga mkono jitihada hizo zitakazoanza kufanywa na kamati hiyo, na kutofumbia macho uharibifu huo wa vyanzo vya maji na mzingira unaoweza kuleta athari za mazingira na viumbe hai wakiwemo binadamu.

Daktari Chuachua ameongeza kuwa uharibifu huo unachangiwa na uwepo wa shughuli za binadamu kwenye maeneo ya vyanzo vya maji ukiwepo uchomaji wa mkaa,  Uwindaji na shughuli za kilimo ambapo baadhi ya wananchi uchepusha maji kutoka katika vyanzo vya maji  na kuyaelekeza kwenye mashamba yao.

Mstahi Meya wa Jiji la Mbeya Mh.Dormohamed Issa amesema kwa niaba ya Baraza la madiwani na madiwani wenzake wanatambua umuhimu wa vyanzo vya maji na maji hivyo wanatarajia kutoa ushirikiano wakutosha ili kuitokomeza tabia ya uharibifu wa vyanzo vya maji katika Halmashauri ya Jiji la Mbeya na Wilaya ya Mbeya kiujumla.

Kwenye Wilaya ya Mbeya kumeanza kujitokeza kukauka na kupotea kwa baadhi ya vyanzo vya maji  ambapo imeelezwa kuwa  katika eneo la milima Mbeya kulikuwa na vyanzo vya maji 49 kutokana na uharibifu huo unaotokana na shughuli za kibinadamu vyanzo vimebakia 12 jambo ambalo ni hatari kwa afya ya binadamu na mazingira.