MABADILIKO YA MFUMO UONDOSHAJI TAKA WAIPA JIJI LA MBEYA NAFASI YA PILI

Imewekwa Tarehe: May 13th, 2024

Halmashauri ya Jiji la Mbeya imeshika nafasi ya pili katika mashindano ya usafi wa mazingira na afya ulioshindanisha majiji sita(6) yaliyopo Tanzania na kutunukiwa cheti pamoja na Shilingi Milioni Mbili.

Akizungumza kwenye mkutano na waandishi wa habari Mstahiki Meya wa Halmashauri ya Jiji la Mbeya Mhe.Dormohamed Issa amesema ushindi huo umetokana na umoja ambao wananchi wa JiJi la Mbeya wameuonesha katika suala zima la kupambana na uchafu uliokuwepo siku za nyuma.

Mstahiki Meya ameongeza kuwa kwenye mashindano hayo yaliyoratibiwa na Wizara ya Afya yalilenga usafi wa mazingira katika maeneo ya mikusanyiko ikiwepo Sokoni,vyoo vya umma,mitaro ya maji,maeneo yenye matumizi ya maji salama na matumizi ya vyoo vya kisasa.

Mshindi  wa  kwanza katika mashindano ni Jiji la Tanga lililopata jumla ya alama 124 kwa 124 huku mshindi wa pili Halmashauri ya jiji la Mbeya likiibuka na alama 97 kati ya 124 kwenye mashindano hayo ambayo yalizinduliwa na Makamu wa Rais Mhe.Philip Isdor Mpango Wilayani Kibaha Mkoa wa Pwani na vyeti kutolewa na Waziri mwenye dhamana ya Afya Mhe.Ummy Mwalimu.

Naye Afisa Mazingira wa Halmashauri ya Jiji la Mbeya Bw.Neemia Mwakatobe amesema awali kulikuwa na changamoto ya uwezo mdogo wa kumudu mfumo wa uondoaji taka kwa kutumia makontena 115 hali iliyosababisha kushika nafasi ya mwisho kwa miaka mitatu mfululizo katika mashindano hayo ya majiji sita ambayo niDodoma, Mwanza, Arusha, Dar es Salaam, Tanga na Mbeya.

Afisa mazingira huyo ameongeza kuwa baada ya mafunzo waliyoyapata Mjini Moshi Mkoani Kilimanjaro mwaka 2022, mfumo wa kutumia magari ya kuondoa taka ulianza na wazabuni wadogowadogo na kisha kuingia mkataba na shirika la Uchumi na Maendelo la jeshi la kujenga Taifa (SUMAJKT)sambamba na kutoa elimu kwa wananchi kutumia mfumo huo uliowezesha kupata ushindi wa pili.

Mwakatobe ameongeza kuwa kwasasa kilichobakia ni kuendelea kuielimisha jamii ya wananchi wa Jiji la Mbeya ili kuimarisha suala la tabia ya kutotupa taka hovyo.