MKURUGENZI NCHIMBI AANZA KAZI RASMI JIJI LA MBEYA

Imewekwa Tarehe: July 3rd, 2023

Mkurugenzi wa Halmashauri ya Jiji la Mbeya John Nchimbi ameanza kazi rasmi baada ya kukabidhiwa ofisi na aliyekuwa Kaimu Mkurugenzi Wakili Triphonia Kisiga kwenye hafla fupi iliyofanyika kwenye ukumbi wa Mstahiki Meya uliopo ndani ya jengo la Halmashauri yaJjiji la Mbeya.

Akiongea na Wakuu wa idara na vitengo wakati wa hafla hiyo Nchimbi amewataka watumishi kuwajibika kwenye utendaji na kuwaeleza kuwa anatarajia kuanza upya bila kuhitaji maneno ya kuchongea wala kuhitaji kujua tabia za watumishi kwavile ataona kila aina ya tabia na matendo wakati wa utendaji kazi hivyo kila mwenye changamoto na asiyenazo anatakiwa kuanza upya na kutenda kazi kwa mujibu wa kiapo chake.

Aidha Mkurugenzi huyo wa Jiji amewataka watumishi kutokuwa na hofu juu ya utendaji wao sababu nani yuko kwenye uongozi au madaraka hivyo kila mtumishi anatakiwa kuwajibika na kutambua kuwa kiongozi anawajibu wa kufuata Sheria,Kanuni na taratibu katika kutenda haki.

“Sina haja ya kuambiwa nani mbaya nani mzuri nataka tuanze upya kila baya na zuri nitaling`amua mwenyewe kwa kuona utendaji kazi wa mmoja mmoja ,idara na vitengo tuna fursa ya kuanza upya katika kuendelea kulijenga Jiji letu la Mbeya”amesema John Nchimbi Mkurugenzi wa Halmashauri jiji la Mbeya.

Kwa upande wake aliyekuwa Kaimu Mkurugenzi Wakili Triphonia Kisiga amemkaribisha Mkurugenzi Nchimbi na amemuahidi ushirikiano wakutosha katika utendaji na mipango ya kulisongesha mbele gurudumu la maendeleo la Halmashauri ya Jiji la Mbeya.

Mstahiki Meya wa Halmashauri ya Jiji la Mbeya Mh.Dormohamed Issa amempongeza na kumshuruku Rais wa Jamhuri ya Muungano wa Tanzania Mh.Dkt Samia Suluhu Hassan kwa kumteua John Nchimbi kuwa Mkurugenzi hivyo yeye na Baraza la madiwani watampa ushirikiano mkubwa na kuendelea kuunganisha nguvu kwa ajili ya kufanikisha mipango na miradi mbalimbali ya maendeleo kwa manufaa ya wakazi wa Jiji la Mbeya na Mkoa wa Mbeya kiujumla.

Baada ya kushuhudia makabidhiano hayo Mkuu wa Wilaya ya Mbeya Mh.Beno Malisa amempongeza aliyekuwa Kaimu Mkurugenzi Wakili Triphonia Kisiga kwa utendaji kazi mzuri na kumkaribisha Bw.John Nchimbi katika majukumu yake kisha akawataka watumishi kuzingatia kauli ya kuanza upya katika kuendeleza kuiboresha na kuijenga Halmashauri ya Jiji la Mbeya.