RC HOMERA AWAAGIZA WAKUU WA WILAYA KUSIMAMIA MIRADI IPASAVYO

Imewekwa Tarehe: January 30th, 2023

Mkuu wa Mkoa wa Mbeya Mh.Juma Homera amewataka wakuu wa Wilaya kusimamia ipasavyo miradi ya maendeleo ya sekta mbalimbali inayotekelezwa katika maeneo yao kwasababu kufanya hivyo ni kumsaidia ipasavyo Mh.Rais wa Jamhuri ya Muungano wa Tanzania Dkt.Samia Suluhu Hassan.

Akiongea kwenye hafla ya kuapishwa kwa wakuu wa Wilaya tatu ziliopo kweye Mkoa wa Mbeya Homera amesema Mh.Rais anatoa fedha kwaajili ya miradi ya maendeleo kwa wananchi hivyo kuna kila sababu wateule wake watekeleze maono yake kwenye sekta mbalimbali zikiwemo sekta ya Elimu Msingi na Sekondari,Afya ,Maji na Miundombinu ya usafirishaji zikiwemo barabara.

Wakuu wa Wilaya wapya watatu wameapishwa mbele ya Mkuu wa Mkoa wa Mbeya Juma Homera kufuatia mabadiliko na uteuzi wa Wakuu wa Wilaya uliofanywa hivi karibuni na Rais wa Jamhuru ya Muungano wa Tanzania Dkt.Samia Suluhu Hassan.

Wateule hao wa Mh.Rais Samia Suluhu Hassan walioapishwa kwenye Mkoa wa Mbeya ni Mkuu wa Wilaya ya Rungwe Mh.Japhari Haniu ,Mkuu wa Wilaya ya Kyela Mh.Josephine Manase na Mkuu wa Wilaya ya Mbeya Mh.Beno Malisa ambao baada ya kiapo cha Ukuu wa Wilaya kwa pamoja waliapa kiapo cha uadilifu.

Baada ya zoezi hilo la uapishwaji aliyekuwa Mkuu wa Wilaya ya Mbeya ambaye kwasasa ni Mkuu wa Wilaya ya Kaliua Mh.Dkt.Rashidi Chuachua amemkabidhi rasmi ofisi Mkuu wa Wilaya ya Mbeya Mh. Beno Malisa kwa ajili ya kuanza kazi ya kuitumikia Wilaya ya Mbeya.