RC.DKT.HOMERA AIPONGEZA JIJI LA MBEYA KWA ONGEZEKO LA MAPATO NA KUPATA HATI SAFI NDANI YA MIAKA MITANO

Imewekwa Tarehe: June 16th, 2025

Halmashauri ya Jiji la Mbeya imepongezwa kwa kuongeza kiwango cha ukusanyaji wa mapato kutoka bilioni kumi na tano miaka minne iliyopita mpaka kufikia kiasi cha shilingi bilioni ishirini nane ambayo sawa asilimia mia moja na kumi(110%)mwaka huu wa fedha 2024/2025.

Akizungumza wakati wa baraza la madiwani kupitia hoja za Mkaguzi Mkuu wa Hesabu za Serikali(CAG),Mkuu wa Mkoa wa Mbeya Mhe.Dkt Juma Homera  amempongeza Mkurugenzi Bw.John Nchimbi,watendaji,Mstahiki Meya Mhe.Dormohamed Issa na Baraza la Madiwani kwa jitihada walizozifanya mpaka kufikia kiwango hicho kwa mwaka huu wa fedha 2024/2025.

Aidha Mkuu wa Mkoa ametoa maelekezo kwa watendaji kuhakikisha wanatumia vyema fedha za serikali wakati madiwani wanaelekea katika mchakoto wa uchaguzi Mkuu unaotarajia kufanyika mwezi Oktoba kwa kumchagua Rais,wabunge na Madiwani baada ya kuvunjwa kwa mabaraza ya Halmashauri zote nchini mnamo Juni 20 mwaka huu.

Naye Kaimu Mkurugenzi wa Halmashauri ya Jiji la Mbeya Bi.Anamary Joseph amekiri kupokea maelekezo hayo kutoka kwa Mkuu wa Mkoa na kuahidi kwenda kuyafanyia kazi ili kuzilinda na kuzisimamia vyema fedha za serikali kwa maslahi ya Umma.

‘‘Mkuu wa Mkoa kwa niaba ya Mkurugenzi na watendaji kwanza tunashukuru kwa usimamizi wako mzuri na kutuongoza mpaka kufikia kuinua kiwango cha mapato na kufanikiwa kupata hati safi kwenye mwaka huu wa fedha ambao umebakiza siku chache kumalizika na maelekezo uliyoyatoa tunakwenda kuyatekeleza’’amesema Bi.Anamary Joseph Kaimu Mkurugenzi Halmashauri ya Jiji la Mbeya

Kwa upande wake Mstahiki Meya wa Halmashauri ya Jiji la Mbeya Mhe.Dormohamed Issa amemshukuru Rais wa Jamhuri ya Muungano Mhe.Dkt Samia Suluhu Hassan kwa fedha za miradi ya maendeleo jijini Mbeya na kuwa pongeza Mkuu wa Mkoa wa Mbeya Mhe.Dkt Juma Homera,Spika wa Bunge la Jamhuri ya Muungano wa Tanzania na Mbunge wa Jimbo la Mbeya Mjini Mhe.Dkt Tulia Ackson na Mkuu wa Wilaya ya Mbeya Mhe.Beno Malisa kwa kulisimamia vyema Jiji la Mbeya katika kutekeleza majukumu yake na kuleta tija kwa jamii.