SERIKALI KUSAINI MKATABA WA BILIONI 99 FEB 11 202..UJENZI WA MRADI WA MAJI KIWIRA.

Imewekwa Tarehe: February 8th, 2023

Mkoa wa Mbeya kwa kushirikiana na Wizara ya Maji na Mamlaka ya maji safi na usafi wa Mazingira Mbeya umeandaa hafla fupi ya utiaji saini mkataba wa ujenzi wa mradi wa maji Kiwira kutoka chanzo cha maji cha Mto Kiwira itakayofanyika tarehe 11 Februari 2023 viwanja vya shule ya Hasanga iliyopo Uyole Jijini Mbeya mkataba ukiwa na thamani ya zaidi ya shilingi za kitanzania bilioni 99.

Akiongea na waandishi wa habari Mkuu wa Mkoa wa Mbeya Mh.Juma Homera amesema mradi huo wa maji unatarajia kujengwa na kampuni ya China Railway Construction Engineering Group kwa kushirikiana na kampuni ya China Railway No.4 kutekelezwa kwa awamu ambapo awamu ya kwanza ya ujenzi utakuwa kwa miaka miwili ukitarajiwa kuanza Februari 25 2023 na itakamilika Februari 24 2025 chini ya usimamizi wa Wizara ya Maji na Mamlaka ya Maji Mkoa wa Mbeya.

Kukamilika kwa mradi huo kunatarajia kuongeza uzalishaji wa maji kutoka lita milioni 66.5 kwa siku mpaka kufikia lita milioni 184 na kwa uhakika wa huduma , Mamlaka itaongeza huduma ya maji kwa wananchi kutoka asilimia 80 mpaka kufikia asilimia 95 na itaongeza huduma ya maji kwa wananchi kutoka wastani wa masaa 19 hadi masaa 24 baada ya mradi kukamilika.

Kwa upande wake Mkurugenzi wa masuala ya ufundi Mamlaka ya maji safi na usafi wa mazingira Mhandisi Barnabas Konga amesema mradi huo wenye awamu tatu ukikamili unatarajia kugharimu shilingi bilioni 250.

Mhandisi Barnabas Konga ameendelea kufafanua kuwa awamu ya kwanza itaanza na ujenzi wa banio lenye uwezo wa kuchukua maji lita milioni 117 kwa siku yatakayo safirishwa kwa njia ya mseleleko kwa umbali wa kilomita 26 mpaka eneo la Ikuti ambapo maji yatatibiwa kisha kupelekwa eneo la Forest ya zamani kutakakojengwa tanki la maji lenye uwezo wa kuhifadhi lita milioni tano.

Kwa mujibu wa Mkuu wa Mkoa wa Mbeya Mh.Juma Homera katika zoezi la utiaji saini mgeni rasmi anatarajiwa kuwa Waziri wa Wizara ya Maji Mh.Jumaa Aweso.