SERIKALI MKOA WA MBEYA YAWATIA MBARONI WATUHUMIWA WA WIZI WA MAPATO …14 WAPANDISHWA KIZIMBANI.

Imewekwa Tarehe: August 28th, 2023

Watuhumiwa 14 wamefikishwa mahakama ya Hakimu Mkazi Mkoa wa Mbeya kwa tuhuma za wizi wa fedha zaidi ya milioni 382 Mapato ya serikali kwa njia ya mtandao kwa kifaa cha ukusanyaji mapato POS mkoani Mbeya na baadhi ya mikoa ya Kanda ya Nyanda za Juu kusini.

Akizungumza na waandishi wa habari Kaimu Mkurugenzi wa Taasisi ya kuzui na kupambana na rushwa Mkoa wa Mbeya Vangsada Mkalimoto amesema watuhumiwa hao wamepandishwa makahamani kwa makosa ya Uhujumu Uchumi,Utakatishaji fedha,Utengenezaji wa genge la uhalifu na makosa ya kimtandao.

Mkalimoto ameeleza kuwa kati ya watuhumiwa 14 waliofikishwa mahakamani yupo Bwana Robert Beleta mkazi wa Jijini Dar es salaam ambaye ni mmiliki wa mtandao huo unaotuhumiwa kwa wizi wa fedha za mapato ya serikali.

Katika uchunguzi wa awali Takukuru wamebaini kila kifaa (POS) kilikusanya kiasi gani cha fedha na wamebaini mali zinazomilikiwa na watuhumiwa hao hivyo utaratibu wa kuzishikilia unaendelea kwa mujibu wa sheria.

Watuhumiwa waliopandishwa mahakamani hii leo ni Isaya Andambwile Gerald mtendaji wa kijiji Halmashauri ya Busokelo,Zuheri Abass Mkwama,Bwigane Mwamelo ,Patrick Mwangali na Khalid Abdallah Habib hawa ni wakusanya ushuru Wilaya ya Mbarali.

Watuhumiwa wengine ni Fadhili Fred Lwesya mfanyabiashara mkoani Mbeya,Daniel Juma Mtweve mfanyabiashara wa Halmashauri ya Mji Tunduma,Tariq Paul Samson mkusanya ushuru Halmashauri ya Rungwe na Ulimboka Adamson mkusanya ushuru Halmashauri ya Mji Tunduma.

Awali akizungumza kwa niaba ya Mkuu wa Mkoa wa Mbeya Mh.Juma Homera ,Mkuu wa Wilaya ya Mbarali Mh.Kanali Denis Mwila amesema mtandao huo na wizi wake upo na tayari wamewakamata watuhumiwa 40 pamoja na mmiliki wake Bwana Robert Baleta kutokea Dar es salaam.

Kanali Mwila ameongeza kuwa wataendelea kutekeleza maagizo aliyoyatoa Rais wa Jamhuri ya Muungano wa Tanzania Mh.Dkt Samia Suluhu Hassan aliyoyatoa Agosti 27 2023 na mengine ya awali katika kulinda na kutetea fedha za serikali kwa ajili ya maendeleo ya nchi na ustawi wa wananchi wake.