SPIKA DKT. TULIA AGUSWA NA KILIO CHA WANANCHI WALIOKUMBWA NA MAFURIKO JIJINI MBEYA

Imewekwa Tarehe: January 9th, 2023

Spika wa Bunge la Jamhuri ya Muungano ambaye pia ni Mbunge wa Mbeya Mjini, Mhe. Dkt. Tulia Ackson Januari 8, 2023 amefanya ziara ya kuzitembelea kaya zilizoathirika na mafuriko yaliyosababishwa na mvua zinazoendelea kunyesha kwenye Mkoa wa Mbeya.

Akizungumza akiwa kwenye ziara hiyo Dkt. Tulia amesema amejionea athari ya mvua hiyo ikiwemo uharibifu wa miundombinu, nyumba na mali mbalimbali za wananchi katika maeneo ya Kata za Igawilo, Uyole, Iganjo na Iduda huku Kaya chache zikikosa makazi kufuatia nyumba zao kubomolewa na mafuriko hayo.

Dkt. Tulia amewapa pole wahanga wa mafuriko hayo na kuwaahidi atashirikiana na Serikali kuhakikisha wanaboresha miundombinu ya Jimbo hilo ili kuwezesha kupunguza athari kama hizo zisijitokeze tena.

Pamoja na mambo mengine Dkt. Tulia ametoa msaada kilo 800 za mchele na kilo 200 za maharage kwa wahanga hao huku akiahidi kushirikiana na mamlaka za Serikali na wadau ili kufanikisha upatikanaji wa misaada zaidi.

“Ndugu zangu niwape pole sana kwa haya maswahibu yaliyowakuta, niwahakikishie Serikali yenu tukufu ipo nanyi katika kipindi hiki na nimeongea na Mheshimiwa Waziri Mkuu kumuelezea haya na amenihakikishia kwamba watakuja kufanya tathimini ili kuona hatua ya kufanya ili kukabiliana na janga hili” Amesisitiza Dkt. Tulia

Kwa upande wa Mkuu Wa Wilaya ya Mbeya Dr.Rashid Chuachua amemshukuru Spika wa Bunge la Jamhuri ya Muungano wa Tanzania ambaye pia ni Mbunge wa Jimbo la Mbeya Mjini Tulia Ackson kwa kuwakimbilia na kuwapole wananchini wa Kata zilizokumbwa na mafuriko ambapo kwa sasa Halmashauri ya jiji la Mbeya inafanya tathimini ya kujua madhara na athari kiasi gani zilizojitokeza.

Pamoja na hayo Halmashauri ya Jiji la Mbeya limemuunga mkono Mh.Spika Dr.Tulia Ackson kwa kutoa kilo 200 za mchele na kilo 200 za Maharage kwa ajili ya kuwasaidia wahanga wa mafuriko hayo.