TAASISI YA TULIA TRUST NA OFISI YA MKUU WA WILAYA YA MBEYA ZACHANGIA UJENZI WA UZIO LEGICO SEKONDARI

Imewekwa Tarehe: March 31st, 2023

Taasis ya Tulia Trust imechangia mifuko hamsini(50) kwa Shule ya Sekondari Legico iliyopo kwenye Kata ya Majengo Jijini Mbeya kwa ajili ya ujenzi wa uzito wa shule hiyo.

Akiongea katika hafla ya kukabidhi mchango huo Mkuu wa Wilaya ya Mbeya Mh.Beno Malisa kwa niaba ya Mkurugenzi wa taasisi ya Tulia Trust Mh.Dr.Tulia Ackson Spika wa Bunge la  Jamhuri ya Muungano wa Tanzania amewata wazazi na bodi ya shule kusimamia vyema ujenzi wa uzio utakao wawekea wanafunzi mazingira mazuri ya ujifunzaji kwa kuwatenganisha na shughuli zingine za kijamii zinazoendelea kutoka kwa wananchi jirani na shule hiyo.

Mkuu huyo wa Wilaya ameongeza kuwa ofisi yake itachangia tofali 500 kwa ajili ya kuongeza kasi ya ujenzi huo na kuwahaidi wazazi,walimu na wajumbe ya bodi ya shule hiyo atawatembelea mara kwa mara ili kujionea kasi ya maendeleo ya ujenzi ambao utaleta tija katika mazingira ya shule.

Aidha Mh. Malisa amefafanua kuwa huo ni utekelezaji wa maagizo ya Mkuu wa Mkoa wa Mbeya Mh.Juma Homera ambaye amewataka wakuu wa Wilaya wote mkoani Mbeya kuhakikisha Shulke zinakuwa na Uzio na suala la chakula kwa wanafunzi linatekelezwa ipasavyo.

Mkuu wa Wilaya ya Mbeya Mh.Beno Malisa amewataka wazazi kupambana kuhakikisha watoto wanapata chakula wawapo shule kwa ajili ya afya na shibe ili waweze kuzingatia kile wanachofundishwa lengo likiwa kuongeza wastani wa ufaulu kutoka C mpaka kufikia A.

Kwa upande wake Mkuu wa Shule ya Legico Bujo Kasambala amesema Shule ya Sekondari Legico ilianzishwa mwaka 1954 ikiwa na wanafunzi 269 wasichana 135 na wavulana 134 ambapo mpaka kufikia mwezi Octoba 2022 Shule imekuwa na wanafunzi 2359 Wavulana wakiwa 1,191 na Wasichana 1,168 huku ikiboresha ufaulu uliopelekea wanafunzi kuchanguliwa kujiunga na kidato cha tano na wengine kujiunga na Vyuo vya Serikali na vinavyotambuliwa na Serikali.