VIJANA MBEYA WAPIGWA MSASA WASISITIZWA KUZIFUATA FURSA ILI KUJIKWAMUA KIUCHUMI

Imewekwa Tarehe: May 16th, 2025

Halmashauri ya Jiji la Mbeya imefanya kongamano maalumu kwa  vijana lililolenga kuwawezesha vijana  katika fursa zinazo tolewa na Serikali ili kujikwamua  kiuchumi na kuwapa maarifa kuhusu uongozi, uzalendo na malezi bora.

Kongamano hilo limeandaliwa na Idara ya Maendeleo ya Jamii  Halmashauri ya Jiji la Mbeya, jukwaa lenye malengo muhimu kama vile  kutoa elimu na mbinu mbalimbali  zitakazowasaidia kuwaendeleza  vijana katika nyanja mbalimbali za maisha

Akizungumza wakati wa ufunguzi wa kongamano hilo, Afisa Maendeleo wa Jiji, Bi. Rita Mushi ambaye pia ndiye mratibu, , ameeleza kuwa lengo kuu ni kumjenga kijana wa sasa kuwa mzalishaji na mtoa mchango kwa maendeleo ya Taifa.

Amesema kongamano hilo limekusanya vijana kutoka Kata mbalimbali ili kuwapa mbinu za kutambua  fursa  zinazotolewa na Serikali ikiwa ni pamoja na  ajira,mikopo ya asilimia 10 inayotolewa na Halmashauri  ili kuinua uchumi wa Taifa letu

Akimuwakilisha Mkurugenzi wa Jiji la Mbeya,  Bi.Nimwindaeli Danieli, ambaye ni Afisa Utamaduni, Sanaa na Michezo Jiji la Mbeya, amesisitiza umuhimu wa ushiriki wa vijana katika shughuli za kijamii na Kitaifa.

Ametaja  kuwa katika Mbio za Mwenge wa Uhuru zinazotarajiwa kufanyika hivi karibuni, miradi mbalimbali ya maendeleo itazinduliwa, akihimiza vijana kushiriki kikamilifu huku wakisistizwa  kuonyesha uzalendo.

Miongoni mwa wawezeshaji waliotoa mada katika kongamano hilo ni Cosmas Kyovecho aliyetoa mada kuhusu fursa za kiuchumi kwa vijana

Kwa upande wake  Dkt.Adrian Balongo amezungumzia uongozi na uzalendo, Bi. Saada Mbalamwezi ametoa elimu ya afya ya uzazi, na Imelda Mlungo aliyegusia suala la malezi na makuzi kwa vijana wa leo.

Vijana wamelipokea Kongamano hilo huku wakitaja ni moja ya njia nzuri kwao kupata mbinu mpya na kuwaongezea maarifa ya kuzitambua fursa zilizopo ambao.