VIWANJA 159 VYA WALIOSHINDWA KULIPIA KUUZWA TENA JIJINI MBEYA.

Imewekwa Tarehe: May 16th, 2024

Halmashauri ya Jiji la Mbeya imeviingiza sokoni viwanja 159 vya wananchi walioshindwa kufikia nusu ya malipo ya viwanja  walivyouziwa tangu mwaka 2018  jijini Mbeya na kuwataka wananchi kuchangamkia fursa hiyo.

 Kwa mujibu wa Tangazo la Mkurugenzi wa Jiji la Mbeya Bw. John  Nchimbi lililotolewa hivi karibuni uamuzi huo unatokana na wananchi hao kukiuka masharti yaliyowekwa ya kulipa ndani ya miezi mitatu mara baada ya malipo ya awali kwa kutokamilisha malipo licha ya kukumbushwa mara kwa mara kufanya hivyo.

Katika tangazo hilo Mkurugenzi ameeleza kuwa viwanja vinavyopatikana  kwa sasa ni  kwa ajili ya Makazi, Biashara, Maeneo ya Taasisi na Nyumba za ibada na kusisitiza kuwa viwanja vyote vilivyo sokoni vimechukuliwa kwa wananchi ambao hawajamaliza malipo yao tangu walipopewa maeneo hayo.

Aidha amewataka wananchi wote ambao hawakukamilisha malipo ya viwanja kwa wakati na kutofikia nusu ya thamani ya viwanja walivyopewa katika miradi ya viwanja ya Iziwa, Iduda, Mwansekwa na Nsalaga kutojihusisha tena na viwanja hivyo kwa kuwa wamevunja masharti kwa kutokukamilisha Malipo kwa wakati..

Mkurugenzi amewataka wananchi wote wenye mahitaji ya viwanja kwenye maeneo tajwa, kufika Halmashauri ya Jiji, Idara ya Mipangomiji na ardhi ili  kuchagua viwanja wanavyohitaji na kufanya malipo ya umiliki wa viwanja hivyo.

Halmashauri ya Jiji la Mbeya ni miongoni mwa Halmashauri chache nchini zinazo twaa na kupima maeneo mbalimbali na kuyauza kwa wananchi ili kulifanya Jiji la Mbeya kuwa katika muonekano mzuri uliopangika.