WADAU JIJINI MBEYA WAHIMIZWA KUHAMASISHA UMUHIMU WA LISHE BORA

Imewekwa Tarehe: April 3rd, 2024

Halmashauri ya Jiji la Mbeya limewasihi wadau na taasisi mbalimbali kujikita katika uelimishaji jamii juu suala la lishe na mifumo ya chakula ili kuendeleza mapambano dhidi ya udumavu Jijini Mbeya.

Akizungumza kwenye kikao maalumu cha kujadili na kupitia ajenda za lishe Mkurugenzi wa Halmashauri ya Jiji la Mbeya Bw.John Nchimbi amesema kuna kila sababu ya kujikita katika mipango mkakati na kubuni mbinu zitakazowezesha na kuhamaisha jamii kuzingatia lishe.

Mkurugenzi huyo ameongeza kuwa watoto wakipata lishe bora tutafanikiwa kujenga taifa lenye nguvu kazi iliyo na afya bora na kupelekea kupata wataalam watakaoweza kusimamia vyema maslahi na maendeleo ya nchi.

Kwa upande wake Mganga Mkuu wa Jiji la Mbeya Yesaya Mwasubila  amesema kuwa hali ya lishe Jijini Mbeya kwasasa  sio mbaya na amewapongeza walimu kwa kuthubutu kuzungumza na wazazi juu ya uchangiaji wa huduma ya utoaji chakula shuleni pamoja na kutaka itungwe sheria ndogo itakayowabana wazazi kuchangia chakula.

Bi.Itika Mlagalila Afisa lishe Jiji la Mbeya amebainisha athari zinazoweza kujitokeza iwapo jamiii itakosa lishe bora ikiwa ni pamoja na kushuka kwa kiwango cha uzalishaji mali kwa vile jamii itakuwa inajiuguza badala ya kufanya shughuli za uzalishaji,uwezo wa mtoto kuelewa awapo shuleni kwa kukosa viini lishe hivyo ni muhimu mama mjamzito kuzingatia lishe katika siku 1000 za ujauzito mpaka kujifungua kwake.

Aidha Bi.Judith Sarapion kutoka Shirika la Helvets ambalo ni muwezeshaji wa Mifumo ya Chakula Jijini Mbeya amesisitiza kuzingatia utoaji wa elimu ya lishe kwa makundi yote kuanzia watu wazima,watoto waliopo shuleni na vijana balehe ili kuweka usawa juu ya utoaji wa elimu ya lishe na waweze kunufaika na lishe sambamba na kujenga kizazi kijacho chenye afya bora.

Kutoka Idara ya elimu msingi Jiji la Mbeya Bi Betha Gerald ameeleza miongozo imeweka bayana kuwa ni wajibu wa mzazi kuchangia chakula pia ni haki ya mtoto kupata chakula akiwa shule mpaka sasa asilimia 44.8 ya wanafunziwa shule za

Sekondari za Serikali  wazazi wao ndio waliochangia chakula shuleni hivyo ameiomba Halmashauri kuendelea kuweka mkazo kwenye sheria ndogo kwa kuwabana wazazi na kuwakumbusha kuwa kuchangia chakula shuleni ni lazima na sio hiari.

Mkakati huu wa wa lishe ni muendelezo ambapo halamshauri ya Jiji la Mbeya kwa kushirikiana na wadau wameweka jitihada za kuhakikisha jamii inaondokana na mitazamo hasi na mila potofu juu ya masuala ya na uchangiaji wa huduma ya utoaji chakula shuleni.